2015年新闻
【煞科大陣仗】阿澤王宗堯 同過百臨記雨中群毆
上传时间:2015-05-28 01:56:32    点击次数:

早前杜汶澤話「香港電影會死,係因為你唔拍啫!發神經!」今日朝早阿澤完成咗佢監製嘅三級江湖片《選老坐》煞科戲,戲中好多演員都有現身,包括王宗堯同黃德斌等,但就唔見黃秋生。

噚日香港大雨連場,天文台發出今年第一個黑色暴雨警告,但大雨過後,入夜氣溫相當悶熱,飾演黑社會大佬嘅阿澤,成晚要扮型着西裝,惟有趁未埋位時除低件褸,到佢拍先至着番。難怪阿澤噚日清晨返屋企沖涼,第一時間喺facebook貼相話要沖個熱水涼慶祝一下。

噚晚9點左右,阿澤先喺中環九如坊同大班臨時演員拍類似誓師大會嘅戲,現場所見都有成三、四十人,阿澤仲大叫:「剷起佢哋個字頭!」成班兄弟就大叫「好」,氣勢都幾勁?!點知之後轉場去上環拍兩幫黑社會開片場面仲誇張,有成百幾位臨時演員,加上現場用大水喉做咗場人造雨,成班演員又要淋濕身認真辛苦,作為監製嘅阿澤就仲慘,成晚同導演邱禮濤騰嚟騰去睇到實,可能因為熱得滯,見佢未埋位都冇乜表情。至於喺戲中演黑社會嘅王宗堯、洪卓立、黃竣峰(前名黃集鋒)全部人都由頭濕到落腳,無一倖免。

扮同性戀大佬嘅王宗堯着住件紅色西裝褸開工,騷味極濃,鏡頭後佢攞住部手提電話周圍影,又同成班女仔匿埋食魷魚絲,收工之前要拍廝殺戲,記者都有埋去同佢做個訪問,佢就話:「都成身濕晒,等陣又要打?!」咁喺部戲入面使唔使死?王宗堯就大賣關子話:「人總要死一次嘅!」至於一向谷慣肌嘅黃竣峰就話:「今晚都谷咗一晚肌肉,以防凍親。」

網通用戶  |  電信用戶
Copyright 2012--2015 www.gregorywong.net all rights reserved 沪ICP备10013878号